比 / 畀 / 俾

廣州話「我 bei2 一本書你。」
普通話意思即係
「我給你一本書。」
有人會寫成
「我比一本書你。」或者
「我畀一本書你。」或者
「我俾一本書你。」都有見過

但係上邊淨係得一個係啱嘅！你又知唔知邊個呢？
而家睇吓各字嘅解釋先...

「比」
讀音：bei2 [彼]
倉頡碼：心心
作為動詞意思係：比較
例句：
比上不足，比下有餘

「俾」
讀音：bei2 [彼]
倉頡碼：人竹竹十
作為動詞意思係：使、把、令到
可見於：
《左傳．成公十三年》：「俾我惠公，用能奉祀于晉。」
《楚辭．屈原．九章．惜誦》：「俾山川以備御兮，命咎繇使聽直。」
例句：
「俾眾周知」（讓大家都知道）
「唔好俾佢跌落嚟啊！」

「畀」
讀音：bei2 [彼]
倉頡碼：田一中
作為動詞意思係：賜與、給予
可見於：
《詩經．小雅．巷伯》：「取彼譖人，投畀豺虎，豺虎不食。」
例句：畀次機會我啦！

所以，
「我比一本書你。」同埋「我俾一本書你。」
都係解唔通嘅。以後唔好再寫錯喇！